Dreizehn Kolonien

As die Drizää Kolonie wärde die britische Kolonie in Nordamerika bezäichnet, wo sich 1776 in dr Unabhängigkäitserkläärig vo de Veräinigte Staate vom Mueterland Groossbritannie drennt häi. Anderi britischi Bsitzige in Nordamerika, wie die früeneri franzöösischi Kolonii Québec und d Kolonie vo Nova Scotia und Prince Edward Island si dr britische Chroone dröi bliibe und si spööter as Kanada veräinigt worde. D Kolonie vo Ostflorida und Westflorida si wääred em amerikanische Unabhängigkäitschrieg ebefalls loyal bliibe.

D Legände verzelt, ass e gwüssi Betsy Ross die ersti Faane vo de Veräinigte Staate mit 13 Stärn und 13 Sträife gnäit häig, äi Stärn und äi Sträife für jedi vo de 13 Kolonie.